الشعب المصرى يرد ال30% لريس مبارك في عيد ميلاده

كل سنة وأنت طيب يا ريس وعقبال 81 سنة ،طبعا مش هقدر ااقول الدعاء الشهير في هذه المناسبة (عقبال 100) لان ساعتها هكون بظلمك - وبتقل عليك - يعني كفاية قوي مع كل عيد ميلاد يمر عليك من 27 سنة تزود المرتبات وتعطي المنح والعطايا لشعبك الفقير الجعان اللي مش لاقي رغيف العيش لحد دلوقتي رغم كل هذه الزيادات
وبجد المرة ده حملت نفسك تكاليف كتيرة قوي -بس طبعا 80 سنة لازم يكون احتفال مش قليل- احتفالات خاصة في كل الجرائد بداية من ليه بنحبك يا ريس ونهاية باحتفاليات إجبارية علي كافة القنوات المصرية المحلية او حتي الفضائية مرور بالاحتفالات الفرعية في الميادين والشوارع والافراح وليلة الملالح اللي اقامها اتباعك ..اقصد حلفاءك .. اقصد رعايك -
وكانت التورت والجاتوهات هي عطتيتك المضاعفة هذا العام الذي لم تحتفل فيه بعيد ميلادك فحسب ،ولكن بفشل الاضراب 4مايو،اللي اتصرف عليه هو الاخر ملايين الجنيهات من اجل اجهاض دعوة خيبة من مجموعة شباب فضية علي الفيس بوك
وعلي راي الدكتور عمرو الشوبكي انه اضراب فضائي
لكن لانك الاب مردتش تحرم جمهور حزبك من الاغداق عليه من الاموال فهذا يطبع بوسترات - وهذا يصمم حملات - وثالث ينسق مهرجانات ورابع .. وخامس ...وكله علي حساب صاحب المحل ..والشعب هيدفع
أنا عارفه ومقدره انك كلفت نفسك كتير والله وزيادة عن اللزوم يعني كان ايه لزمته تورت وجاتوهات والناس مش لاقيه العيش الحاف
ولا كان ايه لزمته ملاحق خاصة بالجرائد اللي تبعك اتكلفت الملايين -
ولا الصرف علي مسلسل اذعي يتناول قصة حياتك وانت علي قيد الحياة
بصراحة امبارح كنت عماله احسب صرفت قد ايه من تكاليف - ولكن الالة الحاسبة خذلتني - فخانات اصفارها اقل من تحديدا ما تكلفته ..
خاصة وان تلك الاصفار لا يوجد مثلها بخزينة الدولة - وعلشان كدا انا مقدره القرار السريع بزيادة الوقود
وهي الناس تركب عربيات ليه اصلا -عندها مترو الانفاق
وليه تشرب سجائر ما كدا كدا قلبنا محروق
ولأن أبو الشعب المصري اللي زيك ..لازم شعبه يقدمله هدية كبيرة تليق بمقامه - علشان كدا وافق نوابه الا من قلة قليلة (شرذمة)علي ان تكون هديته لك في يوم ميلادك ال80 .......رد ال30% الزيادة العلاوة الاجتماعية اللي اقرتها خلال خطابك بعيد العمال قبل خمسة ايام فقط ، وفوقها الضعف كمان لعلك ترضي وكل عام والشعب المصرى طيب وحنين وغلبان ومقهور .. ما دام في عهدك ياريس
وليحيا الريس